काठमाडौँ- पार्टी विवादको निरूपणका लागि बैठक डाक्न नेकपाका बहुमत सचिवालय सदस्यले अध्यक्ष केपी शर्मा ओलीलाई दिएको दुई दिनको समयसीमा आज सकिदैछ ।
कार्यकारी अध्यक्ष पुष्पकमल दाहाल, माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठले सामूहिकरुपमा दुई दिनअघि लिखित माग राख्दै बैठक डाक्न ओलीलाई आग्रह गरेका थिए ।
आवश्यक सल्लाह गरेर बैठक डाक्ने बचन दिएका ओलीले अझै त्यसबारे निर्णय गरेका छैनन् । यद्यपि उनले आन्तरिक छलफल बढाएका छन् ।
आइतबार वरिष्ठ नेता माधव कुमार नेपाललाई बालुवाटारमा बोलाएर ओलीले छलफल गरेका छन् । उक्त छलफलमा ओलीले पार्टी विभाजनबाट जोगाउने भूमिका खेल्न नेता नेपाललाई आग्रह गरेको बताइएको छ ।
उनले आफू निकटस्थ नेताहरूसँग पनि परामर्श गरेका छन् । तर, बैठक डाक्ने नडाक्ने भन्नेबारे अझै निधो गरेका छैनन् । अझै पनि अर्का अध्यक्ष दाहालसँग पूर्वसहमति गरेर मात्रै बैठक डाक्ने तयारीमा रहेका ओलीले महासचिव विष्णु पौडेललाई खुमलटार पठाएका छन् ।
ओलीको सन्देश बोकेर खुमलटार पुगेका महासचिव पौडेलले दुई अध्यक्षबीच समझदारीको कोशिस गरिरहेको स्रोतले बताएको छ ।
आफ्नो सहमतिबिना कुनै पनि बैठक राखे पार्टी विभाजनको अवस्थामा पुग्न सक्ने चेतावनी दिएका ओली फेरि रक्षात्मक बनेका छन् ।
एकलौटीरूपमा राजदूत सिफारिस, मन्त्रिमण्डल पुनर्गठन, कर्णाली प्रदेशका मुख्यमन्त्रीविरूद्ध ल्याइएको अविश्वासको प्रस्ताव र ‘रअ’ प्रमुखसँग प्रधानमन्त्री ओलीले भेटेको भन्दै दाहाल-नेपाल पक्ष ओलीसँग असन्तुष्ट छ ।
सरकारले महत्वपूर्ण निर्णय गर्नुपूर्व सचिवालयका सदस्यको सुझाव, अध्यक्षद्वयको आपसी परामर्श र सहमतिको आधारमा गर्नुपर्ने भदौ २६ गतेको स्थायी कमिटी बैठकका निर्णय प्रधानमन्त्री ओलीले पालना नगरेको दाहाल-नेपाल पक्षको आरोप छ ।
तर, पार्टी काममा केन्द्रित हुने पर्ने दाहालले सरकारले गर्ने स-साना काममा पनि हस्तक्षेप गर्न खोजेको ओली पक्षीय नेताहरू बताउँछन् ।
विवाद बढ्दै गएपछि ओली समूह सम्झौतामा फेरि अर्को संकट टार्ने कसरतमा छ भने दाहाल-नेपाल समूह ओलीकाविरूद्ध बहुमतबाट निर्णय गर्ने तयारीमा जुटेको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
