विद्यालयहरूमा नयाँ शिक्षक, तालिम र आइसिटी ल्याब पुर्याउँदैछौंः शिक्षामन्त्री

काठमाडौँ । शिक्षा, विज्ञान तथा प्रविधि मन्त्री देवेन्द्र पौडेलले सरकारले विद्यालयहरूमा नयाँ शिक्षक, तालिम र आइसिटी ल्याब पुर्याउन लागी रहेको बताएका छन् । भवन नभएका विद्यालयलाई भवन दिने र भवन भएकालाई आइसिटी ल्याब दिने काम सुरु भइसकेको उनले बताए ।

शिक्षा पत्रकार समूहको २२ औँ स्थापना दिवस तथा ११ औँ अधिवेशनको अवसरमा बोल्दै मन्त्री पौडेलले राष्ट्रिय पुस्तकालय र शिक्षक अस्पताल निर्माणको काम अघि बढिसकेको बताए । सङ्घीय शिक्षा ऐनलगायत शिक्षाका ४ ऐन निर्माण प्रक्रिया अन्तिम चरणमा पुगेको भन्दै उनले उक्त ऐनले वर्तमान शिक्षाका धेरै समस्या समाधान गर्ने बताए ।

शिक्षामा सामान्य सुधार गरेर नपुग्ने आमूल परिवर्तन आवश्यक रहेकोमा जोड दिँदै मन्त्री पौडेलले भने– ‘मन्त्रालय एक्लैले
केही गर्न सक्दैन, सबैको साथ र सहयोग आवश्यक हुन्छ ।’ एक अर्कालाई दोषारोपण गर्न छाडेर सबैले आ–आफ्नो जिम्मेवारी पुरा गर्नतिर लाग्नुपर्ने उनको भनाई थियो ।

शिक्षाविद् प्राडा विद्यानाथ कोइरालाले शिक्षामा एकातिर समस्या र समाधान अर्कोतिर हुँदा अस्तव्यस्तता कायमै रहेको बताए । शिक्षा
पत्रकारिता पछिल्लो समय जानकारी दिने मात्रै भन्दा पनि विश्लेषणतिर उन्मुख हुँदै गएको टिप्पणी गरे । यस्तै शिक्षाविद् प्राडा मनप्रसाद वाग्लेले सरकारले शिक्षण सिकाइ पुरा गर्न भन्दा शैक्षिक सत्र भित्रै पाठ सक्न मात्रै लागी परेकोमा आपत्ति जनाए । सरकारले सिकाइमा भन्दा पढाइमा ध्यान दिएको आरोप लगाउँदै चैत भित्र जसरी नि कोर्स सक्नु भनेर निर्देशन दिनु गलत भएको उनको भनाइ थियो ।

राष्ट्रिय परीक्षा बोर्डका अध्यक्ष महाश्रम शर्माले शिक्षाका समस्या समाधान उन्मुख रहेका भन्दै परीक्षा प्रणालीमा वैज्ञानिक सुधार गर्न लागिपरेको बताए । वरिष्ठ शिक्षा पत्रकार राजेन्द्र दाहालले सरकारले शिक्षण सिकाइमा भन्दा परीक्षामा मात्रै ध्यान दिएको आरोप लगाए । ‘हामी कहाँ परीक्षा बोर्ड मात्रै भयो, सिकाइ र पढाइ बोर्ड भएन ।’ दाहालले भने, ‘आइसिटी ल्याब बाँडेर मात्रै हुँदैन त्यो सिकाउन शिक्षकलाई तालीम दिनुपर्‍यो ।’

कार्यक्रममा नेपाल शिक्षक महासङ्घकी अध्यक्ष कमला तुलाधर, नेपाल पत्रकार महासङ्घका अध्यक्ष विपुल पोखरेल, एकोर्यावका अध्यक्ष अर्जुन गिरी, सिजपका अध्यक्ष राजेश शर्मा, शिक्षा पत्रकार समूहका पूर्व अध्यक्ष सुदर्शन घिमिरेलगायतले शुभकामना मन्तव्य राखेका थिए ।

थाहा अनलाइन

यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।