हलिउड मार्फत विश्वभरी चर्चा कमाएकी अभिनेत्री प्रियंका चोपडा फिल्म ‘भारत’मार्फत सलमान खानको जोडीको रुपमा बलिउडमा ‘कमब्याक’ गरिरहेकी छिन् । यो फिल्म बाहेक उनी ‘द स्काई इज पिंक’ मा पनि काम गरिरहेकी छिन् । यही फिल्मका माध्यमबाट प्रियंकाले बलिउडमा अहिलेसम्म कुनै पनि अभिनेत्रीहरुले नगरेको काम गर्दैछिन् ।
सोनाली बोसको निर्देशनमा बन्ने फिल्म ‘द स्काई ईज पिंक’ मा अभिनय गरेवापत प्रियंकाले पारिश्रमिक नलिने भएकी छिन् । उनी यस फिल्मले गरेको ब्यापारबाट हुने नाफाको हिस्सेदार बन्नेछिन् । बलिउडमा फिल्मले कमाएको नाफाको हिस्सेदार बन्ने प्रियंका चोपडा पहिलो अभिनेत्री हुन् । यस अघि बलिउडमा कुनै पनि अभिनेत्रीले यस्तो गरेका थिएनन् ।
प्रियंकालाई ‘द स्काई ईज पिंक’ को कहानी असाध्यै मन परेको थियो । तसर्थ यस फिल्मलाई बनाउनका लागि निर्माताहरुलाई सहयोग गर्नुपर्ने ठानेर उनले पारिश्रमिक नलिई काम गर्ने सोच बाएकी छिन् । उनले सुरुवातमै निर्माताहरुसँग पारिश्रमिक माग्नुको बदलामा नाफाको हिस्सेदार बन्ने निर्णय लिएकी हुन् ।
तर प्रियंकाले यस फिल्मबाट कमाएको नाफाको कति हिस्सा लिनेछिन् भन्ने कुरा अहिले तय गरिएको छैन । बलिउडमा अहिलेसम्म अभिनेता शाहरुख खान, सलमान खान र अक्षय कुमारले फिल्मको नाफामा हिस्सेदार भएर काम गरिसकेका छन् । प्रियंकाको फिल्म ‘द स्काई इज पिंक’ भारतीय मोटिभेशनल स्पीकर आयशा चौधरीको जीवनीमा आधारित फिल्म हो ।
यस फिल्ममा प्रियंका बाहेक जायरा वसीम पनि हुनेछिन् । जायरा वसीमले आयसा चौधरीको भूमिका निर्वाह गर्नेछिन् भने प्रियंका चोपडा जायराकी आमाको भूमिकामा देखिनेछिन् । यस अघि फिल्ममा प्रियंकाको जोडीको रुपमा अभिषेक बच्चनले अभिनय गर्ने भनिएको थियो तर अहिले फरहान अख्तरलाई यस फिल्मका लागि फाइनल गरि सकिएको छ ।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।
