बैशाख २३, २०७५ काठमाडौं
सबै नेपालीलाई स्वास्थ्य बिमामा आबद्ध गराउने सरकारको अभियान अन्योलमा परेको छ ।
स्वास्थ्य अवस्था कमजोर भएका बिरामीको बिमा सरकार आफैंले गर्ने भनिए पनि अर्थ मन्त्रालयले नियमावली रोकेका कारण कसरी अगाडि बढ्ने भन्नेमा स्वास्थ्य तथा जनसंख्या मन्त्रालय अलमलमा देखिएको समाचार थाहाखबरमा छापिएको छ ।
स्वास्थ्य तथा जनसंख्या मन्त्रालयले स्वास्थ्यमा गम्भीर समस्या भएका र आर्थिक अवस्था कमजोर भएका नागरिकको स्वास्थ्य बिमा सरकार आफैंले गर्ने निर्णयसहितको नियमावली तयार गरेर अर्थ मन्त्रालयमा दुई महिनाअगाडि पठाएको थियो ।
तर, नियमावलीबारे अर्थ मन्त्रालयले आवश्यक राय नदिँदा स्वास्थ्यमा गम्भीर समस्या भएका बिरामीदेखि गरिब र सरकारी कर्मचारीको बिमा अभियान अन्योलमा परेको सामाजिक स्वास्थ्य सुरक्षा विकास समितिका निमित्त निर्देशक डा भुवन पौडेलले बताए।
समाचारमा जनाइए अनुसार लामो समयदेखि नियमावली रोकिएका कारण सरकारी सेवामा आबद्ध भएका र वैदेशिक रोजगारीमा जाने कामदारको समेत स्वास्थ्य बिमा रोकिएको छ ।
सरकारी कर्मचारी र वैदेशिक रोजगारीमा जाने कामदारको स्वास्थ्य बिमा अनिवार्य गर्ने सरकारी निर्णयअनुसार नियमावली तयार गरेर अर्थ मन्त्रालयमा पठाइएको थियो।
यो नेपाली भाषाको अनलाइन समाचार संस्था हो । 'थाहा अनलाइन' २०७३ साल देखि सञ्चालनमा छ ।